Мрежата на Антико од 2004-та година освен работилници и семинари со жени на важни теми од градењето на мирот во заедницата, меѓуетничките односи и родовите прашања, започна континуирана работа и активно делување со средношколци во 8 локални заедници на Република Македонија. Во текот на 2005-та година спроведовме истражување – анкетирање на 1.133 средношколци од 17-20 годишна возраст. Добиените резултати од анализита ни дадоа јасна слика за состојбите, проблемите и потребите на младите. Врз основа на добиените резултати дизајниравме програма за работа, ги избравме целните групи и изработивме прирачник за интерна употребакој им послужи како алатка на нашите 20 едукаторки кои посетија дополнителна обука за обучувачи (ТОТ) за зголемување на знаењата и способностите за успешно фацилитирање и спроведување на метологијата на интерактивна работа со млади. Едуцираните локални тимови на Антико фацилитираа 144 мултиетнички работилници. Работилниците се реализираа во 3 циклуси во времетраење од 3 месеци за една група на учесници. Во нив учествуваа 543 средношколци, од кои 334 девојки и 209 момчиња од Куманово, Скопје, Битола, Кичево, Дебар, Пробиштип, Крушево и Гостивар. Работилниците дадоа придонес во создавањето на услови и можности за меѓуетничка интеракција, зголемување на комуникацијата меѓу младите, намалување на етничките и родовите стереотипи и предрасуди. Индикатор за оствареното позитивно влијание се и 15 заеднички иницирани, организирани и спроведени јавни акции во заедницата од страна на целните групи на актуелни табу теми од меѓуетничките односи и родовите прашања.

 

При реализирањето на активностите неформалната група соработуваше и со други засегнати страни во заедницата, дебатираа ги изнесуваа своите мислења и ставови во однос на развојот на меѓуетничките односи и зголемувањето на меѓусебната соработка, толеранција и дијалог. Во рамките на проектот „Партнерство за еднаквост“ во 2006 година се реализира анкета со средношколци (1.187 – ученици од втора и трета година). Истражувањето имаше за цел да даде јасна слика за нивото на присутност на етнички и родови предрасуди и стереотипи меѓу средношколците од различни етнички групи. Ова истражување ни помогна во дизајнирањето на едукативната програма со модули кои дадоа адекватен одговор за надминување на постоечките предизвици. Во текот на 2006, 824 средношколци учествуваа во циклуси од 180 мултиетнички работилници во 8 локални заедници на Република Македонија. Како резултат на работилниците, од страна на целната група произлегоа иницијативи и се формираа 8 неформални групи со мултетнички состав. Членовите на мултиетничките групи се дружеа и работеа заедно. Тие иницираа и спроведоа 17 јавни акции во заедницата на теми од меѓуетничките и родовите односи, етничките и родовите стереотипи, развојот на граѓанскиот активизам, волонтерството, запознавање на меѓусебните култури, човековите/женските права и други актуелни теми во заедниците. Во реализираните активности во рамките на локалните акции учествуваа над 1.200 средношколци професори, училишни педагози, психолози, родители, преставници од локалната самоуправа и други релевантни институции.

 

Спроведените активности во рамките на двегодишниот пилот проект реализиран во 8 мултиетнички локални заедници на Република Македонија, на програмските тимови на Антико им послужија како добри практики и големо искуство во дизајнирањето на сеопфатната програма за млади, која ќе ги третира прашањата на мултетничката соработка, поттикнувањето на граѓанскиот активизам, придонес кон родово сензибилизирање на младите и градењето на мирот во заедницата.

 

Спроведената метологија на работа се покажа како многу ефективна во оваа фаза на делување, бидејки таа преставуваше основен чекор кој беше насочен кон мотивацијата, освестувањето и потикнувањето на младите (примарната целна група) односно намалување на етничките предрасуди, стереотипи, социјалната дистанца и сегрегација врз основа на етничкото потекло.