Од април 2015 година, ЖГИ АНТИКО започна со имплементација на проектот „Економско јакнење на жени во две општини“ кој финансиски е поддржан од страна на Британската Амбасада во Македонија. Главната цел на проектот е дизајнирање на модел и пилотирање на партиципативен пристап базиран на докази во креирањето на ефективни родово политики за економско јакнење на жени. Проектните активности се спроведуваат во општините Битола и Кичево како мултиетнички општини кои во рамките на својата територија вклучуваат рурални и урбани средини. Проектот ќе биде имплементиран во периодот 01.04.2015 – 31.03.2016.

Целни групи на проектот се релевантни претставници на единиците локалната самоуправа од општините Кичево и Битола и граѓански организации кои дејствуваат во областа на женските и човековите права и економското јакнење. Во спроведувањето на дел од активностите, ќе бидат вклучени и невработени жени во таргетираните општини. Проектот, преку имплементацијата на активностите, ќе придонесе кон креирање на родово сензитивни политики и акции за зголемување на учеството на жените на пазарот на трудот на локално ниво и креирање на овозможувачко опкружување за подобрување на неповолната положбата на жените во пазарот на трудот во таргетираните општини. Се очекува и зголемување на интерсекторската соработка на релевантните институции во односната тема и особено зголемување на соработката на граѓанските организации и единиците на локалната самоуправа при креирањето и спроведувањето на политики.