На 06.09.2011 и 03.11.2011 година беше реализиран циклус од 4 едукативни работилници во општина Илинден, со претставнички од Комисијата за еднакви можности, локалната администрација и претставници од основните училишта, со цел зголемување на свеста, вештините и капацитетите на учесниците за препознавање на родовите потреби и нивна практична имплементација.

 

Дискусиите за време на работилниците беа насочени кон состојбата на жените во општината во неколку клучни сектори како што се вработувањето, политичкото учество, образованието, здравствената заштита и сл. Учесничките истакнаа дека жените се активни во јавниот и политичкиот живот и дека процентот на вработени жени во општината е на завидно ниво. Исто така, споменаа дека жените се присутни на раководни позиции во рамките на локалната власт и дека не гледаат причина зошто би биле маргинализирани кога имаат и образование и квалитет да бидат успешни.

 

Како и во другите општини со кои досега соработувавме, кога станува збор за родовото буџетирање, учесничките истакнаа дека освен мал фонд на средства од општинскиот буџет алоцирани за одредени активности од Локалниот акциски план за родова рамноправност, во моментот нема услови за поамбициозни акции за примена на оваа алатка при планирањето и трошењето на буџетските средства. Но, тоа не значи дека во иднина нема да се направат напори, односно да се создадат услови за примена на родовото буџетирање.

 

Во однос на проблемот со семејното насилство се разговараше дека жртвите немаат храброст да го пријават и затоа немаат индикатори дали и колку е присутно во општина Илинден. Учесниците истакнаа дека е потребна едукација од најмала возраст (да бидат застапени ваков вид на програми во образовниот процес), со цел да се превенира појавата на предрасуди и стереотипи кои понатаму водат кон дискриминаторско однесување и насилство. Беше договорено во наредниот период да се реализира локална акција која ќе вклучува едукација на младите во основните училишта за превенција и заштита од дискриминација и насилство;

Од страна на ЖГИ Антико им беше понудена помош и поддршка (дополнителни едукации, консултации и сл.), а истовремено на учесничките им беа посочени можните институции/лица кои би можеле да им помогнат околу заштитата и превенција од дискриминација и насилство.