Резултатите од спроведената родова анализа на кандидатските листи за Предвремените парламентарни избори 2011 и анализата на изборните резултати, покажаа дека нема некој позначаен напредок кога се работи за застапеноста на жените на изборните листи и избраните жени во Парламентот, во однос на минатите избори. Процентуалната застапеност на жените на кандидатските листи се движи од 30% (40 изборни листи) до максимални 60% (само една кандидатска листа). Ваквата распределеност на жените на кандидатските листи се рефлектира и врз изборните резултати (30,9% - минимум исполнување на квотата)што укажува дека учеството на жените во Парламентот сé уште е резултат на институционалните механизми, односно законската квота од 30%, а не на политичката волја и убедувањето на политичките субјекти.

Се наметнува заклучокот дека доколку не се превземат поамбициозни акции (од страна на граѓанскиот сектор, политички партии, механизмите за родова рамноправност и други засегнати страни) и оние резултати кои досега се постигнати се доведени во прашање, а постои и можност да се вратиме и чекор наназад - како што е состојбата со изборот на градоначалници на општините (од 3 жени градоначалнички во претходните мандати, во моментов ниту една жена не е на оваа функција).

Имајќи ги предвид погоре споменатите констатации и заклучоци, им се обраќаме на сите релавантни субјекти на национално и локално ниво, општата јавност и медиумите со БАРАЊЕ, да дадат свој придонес во процесите за зголемување на учеството на жените во структурите на одлучување и унапредувањето на родовата рамноправност. Следствено на тоа, ги упатуваме следниве препораки:

 

-       Да се воведат квоти во рамките на политичките партии со што ќе се овозможи подеднакво учество на двата пола во структурите на одлучување и креирање на политики на партиите,  програми и стратегии.

 

-       Доследно да се применува и почитува Законот за еднакви можности на жените и мажите, редовно да се подготвуваат и објавуваат извештаи за напредокот, од страна на надлежните институции и да се применуваат соодветни санкции против оние кои не се придржуваат кон законските одредби.

 

-       Да се подобри работата на Комисијата за еднакви можности (КЕМ) при Единиците на локалната самоуправа (ЕЛС). Да се воведе пракса на родовата анализа и интеграција, како еден од најважните предуслови за постигнувањето на позитивни промени и одржливи резулатити.

 

 

-       Поголеми заложби и активност од страна на Парламентарната Комисијата за еднакви можности при Собранието на РМ , во однос на изработката на анализи и покренување на иницијативи за  усогласување на другите законски прописи со ЗЕМ.

 

-       Реактивирање на работата на Женскиот парламентарен клуб во Собранието на РМ, со цел да се добие моќна организирана структура  која ќе ја препознава  и застапува правата на жените од повеќе категории кои се изложени на дискриминација и социјална неправда.

 

 

 

 

Женска граѓанска иницијатива АНТИКО

Контакт телефон: 02/ 2 614 641

E-mail: antico@t-home.mk; web site: www.antiko.org.mk                                                                           20.09.2011, Скопје